Мана бундай гапларни қаердан топамиз-а?!
ЮНEСКО қошидаги Бутунжаҳон Ёзувчилар уюшмасининг “Вильям Шекспир” номидаги Халқаро мукофоти совриндори
https://uza.uz/uz/posts/ozbek-adibasining-kitobi-taqdimoti-janubiy-koreyada-otkazildi_538156
ЮНЕСКО қошида ҳеч қанақа ёзувчилар уюшмаси йўқ. Ўзбекистонда Шекпсир номидага халқаро мукофотни олган адиба бор экан-у билмай юрган эканмиз-да!
Ким нимани биларди, деб истаган нарсани ўзингизга ёпиштиравермангиз, уят бўлади. Ёшларни, айниқса, ҳаваскорларнинг ҳавасларига гоҳ-гоҳ кўзим тушиб қоляпти. Масалан, инглизча ё русча таржима асарингиз Бельгиядаги қайсидир сайтга қўйилгани кўз-кўз қилинадиган иш эмаслигини яхшилаб тушуниб олинг. Бу “Россияда ўзбекча шеъримни босишди”, деган гапга ўхшайди.
Сохта мукофотлар, сертификатлар, Амазон ва Лулулар ҳақида ёзганларим билан яхшилаб танишиб чиқинг. Ҳозирдан шуҳратпараст бўлманг. Сал олдин ёзганим қуйидаги постнинг охирги гапини яхшилаб қулоғингизга қуйиб олсангиз, илтимос.
###
Йил бошидан аллақандай сертификатлар кела бошласа, ўзимни ноқулай ҳис эта бошлайман. Ўзим билган, таниган ташкилот ё одамдан бўлса ҳам майли. Ва ё ўзим бевосита иштирок этган, ҳеч бўлмаса онлайн қатнашган тадбир ташкилотчисидан бўлса қани. Йўқ-да! Ҳеч қатнашмаганим тадбирда “фаол иштирок” этибман-да! Ҳатто ғолиб ҳам бўлибман! 🙂
Фейсбукда баъзи ижодкорлар орасида сертификат, сохта медал ва орденлар билан мақтаниш урф бўлиб бормоқдалигини кўряпман. “Йил шоири”, “Шоираи даврон”, фалон гуруҳнинг “Энг фаол ижодкори” каби бемаза қоғозлар. Уларнинг аксари Африка ва Жанубий Америка давлатларидан. Ўша алламбало сертификат ва дипломни олаётган ижодкоримиз унда аслида нима деб ёзилганини тушунса кошки. Исм-шарифини кўради-ю дўппини осмонга отади! У мамлакатни қаерда жойлашганини-ку умуман билмайди ҳам.
Баъзи шоирлар гўё ўзларининг “халқаро фонд” (жамғарма)ларини ҳам очиб олган, фонд ўзларининг номида ва ҳаммага қаторасига ўйлаб-нетмай ўша фондларининг медалларини, орденларини тақдим этиб боряпти ҳатто.
Сиз улардан баландроқ туринг, сохта сертификатга, медалга, мукофотга ўч бўлманг. Улар сизни зўр ижодкор ҳам қилиб қўёлмайди. Яхшиси, бу йил ўша сертификат ва мукофот бераётган мамлакатларга ижодий сафар қилишни режалаштиринг, ҳеч йўқ Ҳиндистондан бошланг. Мени айтди дейсиз, Аграга бориб, Тож Маҳални кўришингиз мингта сертификатдан, 100 та сохта медалдан аълороқ.
