2008 йили Ҳиндистоннинг Ассам штатида нашр этилган ўзбек шеърияти антологияси. Шоир Праяг Сайкиа ассам тилига ўгирган. Бу китобчага 2004 йили Тошкентда чиқарганим инглиз тилидаги шеърий антология асос бўлган. 2005 йили биринчи марта Ҳиндистонга борганимда бир мушоирада ассамлик таржимон Кришна Дулал Баруа ҳам қатнашган, инглизча антологиядан унга ҳам совға қилгандим. Ҳиндистон шимолидаги Ассам штатига қайтиб боргач, Кришна у ерда шоир дўсти Праяг Сайкиага ўзбек шоирлари билан танишгани, шеърлари жуда маъқул бўлганини айтиб беради. Сўнг икковлон антологияни ассам тилига ўгириб, чоп этишади. Ўшанда китобдан 50 дона сотиб олганман, Праяг Тошкентга почта орқали етказганди. Қашқадарёда Ўроз Ҳайдар деган шоир бўларди, вилоят ёзувчилар уюшмасига раис бўлганидан кейин ҳеч кўрмадим. Ассамда чиққан антологияда Ўроз аканинг ҳам шеърлари бор. Камтарона хизматимни қадрлаб, ўзим пул сарфлаб олиб келтирганим китобдан бир нусха сотиб олган ягона шоир ўша бўлади. Раис бўлмасидан аввал анча эркинроқ эди. Омон бўлсин!
