Юрагингга

Юрагингга бир томир
Бўлолсайдик, Шотилло!
Бу дунёга қайтариб
Ололсайдик, Шотилло!

Дунё асли бевафо,
Сўнгги манзил қабрдир,
Тирикликнинг зийнати
Сабр, сабр, сабрдир!

Бу дунёга сиғмаган,
Ширин сўзли, Шотилло!
Қалби нафис, сахий дўст,
Очиқ юзли, Шотилло!
ҚЎшиқларинг жаранглар
Ширин овоз, акам-а,
Кўксидадир қўллари
Меҳмоннавоз акам-а.

Ҳамкасбларинг сафида
Элчи келди уйингга,
Оҳ, борсак бўлмасмиди
Қизу ўғил тўйингга?

Фарзандларнинг суянчиқ
Тоғи эдинг, Шотилло!
Оиланинг гуллаган
Боғи эдинг, Шотилло!

Вақти келиб, борамиз
Худога биз, биродар.
Жойинг бўлсин жаннатда,
Дуодамиз, биродар!

Юрагингга жон томир
Бўлолсайдик, Шотилло!
Бу дунёга қайтариб
Ололсайдик, Шотилло!